برطانوی پاسپورٹوں کی لگے گی لوٹ سیل،نیلامیاں ہوں گی

(ایجنسیز)
لندن…برطانوی حکومت کی مالی صورت حال کا اندازہ اس بات سے لگایا جا سکتا ہے کہ اس نے اپنے پاسپورٹس کی لوٹ سیل لگا دی ہے، تاہم اس سہولت سے صرف امیر افراد ہی فائدہ اٹھا سکیں گے۔ برطانیہ کی مائگریشن ایڈوائزری کمیٹی نے اپنا نیا منصوبہ جاری کیا ہے جس کے مطابق برطانوی حکومت ہر اس شخص کو ویزا دے سکتی ہے جس کے پاس برطانیہ میں سرمایہ کاری کے لیے کئی ملین پاوٴنڈز ہوں۔ کمیٹی کے چیرمین پروفیسر سر میٹ کاف کا کہنا ہے کہ اس مقصد کیلئے



ویزوں کی نیلامی بھی کی جاسکتی ہے اور تعلیمی اداروں کو بھاری چندہ دینے والے افراد کو منتخب بھی کیا جاسکتا ہے۔ کمیٹی کی جانب سے ایک ملین، پانچ ملین اور دس ملین پاوٴنڈز کے بونڈ خریدنے والوں یا سرمایہ کاری کرنے والوں کو پیش کش کی گئی ہے جس کے تحت وہ دو، تین یا پانچ برسوں کیلئے رہائش کی درخواست کرسکتے ہیں۔ اس مدت کی تکمیل کے بعد یہ افراد برطانیہ کی شہریت کے لیے اپلائی کرسکیں گے تاہم برطانوی وزارت داخلہ کی جانب سے اس منصوبے کی مخالفت کا امکان ہے۔